有人話我, 成日剩係識得扮好人......

其實, 我自己都唔知自己算唔算係好人, 或者我份人優柔寡斷, 唔識得拒絕人, 又或者我份人無乜安全感, 鐘意分散投資, 唔鍾意將所有雞蛋放埋同一個籃啦, 或者, 其實, 我係輸唔起. 所以總括黎講, 我唔係好人.......我都唔想做好人, 好人依個稱號太沉重啦.

又可能我係用好心諗住對人好, 點知係害左一個人, 我唔知, 可能我自私, 我成日記住一句, 寧願我負天下人, 莫叫天下人負我....不過其實真係負我既人比起我負既多. 當然我都負過好多人, 在此衷心向所有我負過既人, 講聲對唔住...

所以我其實覺得, 我應該算係衰人, 但唔係壞人, 我本質唔壞, 不過我好心做壞事.

由細到大, 我份人都好自信架, 讀書, 因為入左間野貓中學, 根本就搵唔到對手, 所以求求其其, 盡少少力, 就好可以考到好好既成績.出黎做野, 又真係好好運, 又蘿底都可以俾人摷番上黎. 果陣時成日覺得自己, 天下間罕逢敵手.

同埋我份人死好命, 97年之前, 原全係乘風破浪, 完全無遇過失敗既場面, 所以97一舖就將我打沉啦, 到依家都仲未算恢復元氣.

97年後, 雖然波濤駭浪, 險象環生, 我又舖舖死過返生喎, 於是就養成個心理. 自己份人命水好. 好似想要乜, 就有乜, 就算遇到逆境, 都好似有貴人負持咁, 逢凶化吉.

不過就算我恢復元氣, 我都好難做到以前咁揮洒自如架啦, 硬係覺得面前好多個責任要去面對, 同埋我份人的而且確變左啦,變左好收收埋埋, 或者我真係有少少自閉症啦.

今年算係我由02年起計最好運既一年啦, 我唔知依個運可以維持到幾時, 之前個七年浩劫我都支持得住, 但係我唔知下一個浩劫黎既時候, 我仲有無個心去支持落去呀, 我覺得自己個人好攰, 係身體上既攰, 亦都係心理上既攰, 好似faye個首歌"迷路"咁, 依家我做人無乜方向架, 剩係掛住儲錢, 但係儲完錢, 又唔知拎黎做乜.....好在仲有d寄託.

不過我份人, 由細到大都係咁架啦, 一年硬係有幾日胡思亂想, 所以我認我係傻, 我係癲, 同埋, 我唔係好人......其實諗番起上黎, 我依世人都做過好多壞事, 爭在未殺人放火姐....人不為己, 天諸地減嘛.

其實邊個岩, 邊個錯, 都好難定奪架啦 我只係想, 平平靜靜咁活下去. 病魔, 希望妳唔好再煩住我啦, 我雖然唔係好人, 但係都唔係大奸大惡呀. 雖然我都唔值得妳可憐. 拜託啦, 我只想開心咁生活.

我係衰人 25/9/2006