1993年亞洲電視台慶劇,一套違反了香港劇集公式的電視劇。
甚麼是香港劇集的公式,主角一定是爛好人(如巴不得爸爸),或者是亦正亦邪(如巾國梟雄),又或者是一開頭衰衰格格,到最後被家人或朋友感動再次變番做爛好人(如近期的情越雙白線),他們亳無例外地和女主角有一些經歷,到最後和女主角發展起一段火辣辣的戀情,誰知道情天霹靂,就係呢個時候,第二男主角或女主角出現,他/她們身負了拆散男女主角的使命,中間又可能夾雜了一些陰謀,就在男女主角無論是戀情或生活都出現前所未有的大危機時,主角無敵定律爆發,於是好人有好報,壞人有天收的結局出現,男女主角從此之後可以快快樂樂在一起。又或者結局出人意表一些,男女主角隨便一個瓜柴(如蒲松齡、巾國英雄),留給觀眾無限遺憾。
我所以說銀狐呢套劇違反香港劇集公式,因為呢套劇係一套冇天莊既電劇。即係主角係一個人渣 + 好人不長命,禍害遺千年。
故事大致如下:
男主角(黃日華 飾)本是一個農村青頭仔,同佢個老婆仔(蔡曉儀 飾)一齊出到省城,點知比條省城大鰐(方剛 飾)睇中佢老婆仔,老婆仔起初都好反感,但逐漸發現,大鰐雖然唔靚仔,但比起做青頭仔呢個死窮鬼既老婆,做大鰐個老婆可以拎LV,食鮑魚食到反肚,數銀紙數到嘔白泡,
於是權衡利害下,同青頭仔講句「SORRY!唔好意思。」就拜拜走人。
青頭仔當然唔想老婆仔走,就好似隻死狗咁走去求個老婆,點知個老婆好似董伯伯上身淨係識得同佢講早晨,青頭仔無奈之下,只有去找大鰐談心,點知大鰐都淨係識得講早晨,不過係用支搶講,好加在有主角威能護體,大難不死,並揚言「寧教我同天下人講早抖,莫教天下人同我講早晨。」
至此青頭仔變做古惑仔,一邊食小明星(曾華倩 飾)的軟飯,一邊籌備「大鰐快D抖」計劃。
計劃好簡單,佢知道大鰐出名咸濕,而佢個敗家仔(江華 飾)比佢仲咸濕,於是安排一個大美人(伍詠薇 飾)係佢地兩父子中間,先令個敗家仔鐘意大美人,再叫個大美人同大鰐攪野,如此過了一段時間,在敗家仔愛到大美人要生要死既時候,才好驚訝發現到自己個老豆搶左佢條女,至此兩父子關係埋下了裂縫。
另一邊,古惑仔都唔係淨係食軟飯同攬陰謀,佢聯同大鰐個二仔二世祖(呂頌賢 飾),一齊攪左個小電影公司,仲攪到有聲有色冇格仔,兼捧紅埋一直比軟飯佢食既明星仔,至此當年既農村青頭仔終於出人頭地。
正所謂窮在鬧市無人聞,富在深山有人知,佢既前妻老婆仔知道以前個老公發左達,加上個自從嫁左比大鰐後,大鰐就當佢係抹完屁股既廁紙,又剛好呢個時候古惑仔想要利用老婆仔進行佢對付大鰐既計劃,所以兩個人一揵即著,老婆仔繼之前個老公古惑仔後,又再次比綠帽老公戴,只不過今次換了對象。
古惑仔天天在床邊對住老婆仔講:你是我的太陽,你是我的月亮終於迷到老婆仔頭暈暈,替古惑仔開佢老公個夾萬,攪到大鰐損失慘重,大鰐後來知到原來係老婆仔拎左佢夾萬d銀紙貼仔,即時怒火中燒,叫手下拎把刀裸支槍去同老婆仔埋單,老婆仔收到風當然第一時間著草搵奸夫避難去。
奸夫古惑仔由始至終都只不過係利用老婆仔穿大鰐櫃桶底,原本仲想等佢去穿多幾次,佑唔到咁快東窗事發,既然老婆仔比大鰐掃左出門口,利用價值等於0,亦係一雪昔年綠帽恨既時候。
當老婆仔滿心歡喜來到古惑仔面前,諗住此後二人雙宿雙棲,點知古惑仔二話不說扔佢入黑房,然後淨係同佢講早抖,老婆仔呢個時候知道眼前呢隻野原來要同自己翻舊帳,當然又係第一時間著草,不過和大鰐不同,古惑仔經過上次慘痛教訓,知道眼前呢個女人無野叻,最叻就係著草同埋織頂綾帽比人戴,有過第一次教訓,今次古惑仔學精,有理無理先扔佢入黑房,總算一夜夫妻百夜恩,古惑仔冇收佢皮,淨係精神弱待等佢自己收自己皮。
大鰐方面,走左老婆仔其實都唔係話好傷心,反正玩厭左,最令佢火滾係比人戴左綠帽,一生人之中,只有自己可以比人戴綠帽,冇人可以戴佢綠帽,點乜知,話口未完,第二頂綠帽又照頭粒過來,而今次送綠帽比佢戴既就係佢個大仔。
敗家仔一直都鐘意大美人,即使後來佢老豆娶左大美人做妾侍,敗家仔對大美人既愛意一直冇變,何況佢同自己個咸濕老豆一樣,都係鐘意朋友妻咻走雞,今次仲要係老豆妻,真係越諗越刺激,結果在一個月黑風高的晚上,敗家仔和大美人上演了一幕近親相O。
大鰐知道後幾乎激到心臟病發,佢收番一路以來下放比敗家仔既權力,敗家仔為左對抗老豆同埋搶番條女,投靠古感仔,古惑仔當然求之不得,佢聯同死差佬(譚炳文 飾)整到敗家仔,仲要賤格到等敗家仔以為係佢個咸濕老豆整鬼自己,於是你做初一我做十五,敗家仔在古惑仔協助之下拎住支鎗逃獄,然後去搵佢個咸濕老豆報仇。
所謂報仇,敗家仔只不過係諗住搶左大美人,等佢老豆戴綠帽,點乜知佢老豆一見到個仔拎住支鎗企係屋企門口,就以為個死仔想殺老豆,於是先下手為強,用支AK47打瓜佢再講,敗家仔見個老鬼開鎗,自己當然唔客氣,兩父子在家亙射,結果一死一重傷,死既係敗家仔,不過原本敗家仔都係重傷,但後來當敗家仔流住血離開屋企時,一直守候在外既古惑仔見佢未死就同佢補多鎗。
而大鰐雖然死唔去,但因為個衰仔都好狠,射左佢好多鎗,所以都終身殘廢。古惑仔就喺呢個時候好得戚走去佢床邊,陰陰嘴同大鰐講呢一切都係佢既連環計,又佑唔到大鰐一代梟雄咁唔襟激,聽吓聽吓就咁激死左。
大鰐去左搵天主後,古惑仔成為省城最有權勢既人,古惑仔亦都變成大享。
不過大享都唔係得意好耐,佢未婚妻小明星知道大享咁陰側,移惰別戀大鰐個死剩種二世祖,大享都開始知道小明星個心已經唔係佢果度,不過留唔住佢個心都要留住佢個人,點都唔要再戴多次綠帽。
於是佢就趁住二世祖坐廉價航空去傾生意既時候,順手炸埋架飛機,小明星傷心二世祖就咁瓜老親,覺得死因有可疑,後來查吓查吓知道係大享攪鬼,就搵班友綁架大亨,諗住整D阿犘利亞飲死大享,點知大亨有學過詠春,一個反手,將阿犘尼亞隊番比小明星慢慢嘆番,小明星飲到翻白肚入醫院。
就當小明好辛苦訓係醫院張床時,佢隱約在病房門外聽到二世祖把聲,大亨就企係佢床邊,佢彎低身,好細聲喺老婆仔耳邊講:「衰婆,你唔係思覺失調,條奸夫死唔去喺出面,不過我唔會比見佢,我要你死都唔眼閉。嘿嘿嘿~~~」講完,蚊左老婆仔條養氣管,老婆仔理所當然去搵天主。
泥到呢個時候,全劇仲有一集就要玩完,如果就咁比大亭逍遙法外冇天收,未免太過冇教育意義,所以在最後,編劇安排另一個賤人擦鞋仔(張家輝 飾)同大亭講早抖,於是大亨就以一個二打六死法去見天主。
咩叫二打六死???就係好單純中鎗訓底,冇配樂,冇慢鏡,冇其他角色為佢傷心。
如果擦鞋仔由始至終都係一個正氣角色,又或者好似柴九哥咁係一個亦正亦邪既角色,佢殺大亭係為左天上蒼生,咁銀狐就同一般電視劇冇乜分別,佢特別之處就係撩鞋仔由始至終都係一個賤人,當佢殺左大亨後,下一步要做既就係吞併二世祖間小電影公司,結果二世祖比佢攪到訓街,臨尾好好無奈地只有好似隻癲狗鬧二世祖叫佢等天收。
擦鞋仔下一步要做就係要對付自己老豆,因為佢老豆係一個正人君子,成日同佢講錢唔重要,重曾經試過大義滅親,於是假仁假義話請老豆食飯,不過生得佢出,做老豆又點會唔知個衰仔既性格,一定係有陰無,唔係點會無端請自己食飯,於是連飯都美食,就同自己從前個老相好一齊著草。
至此擦鞋仔雖然唔可以對付到個老不死,但佢而家有財有勢有靚老婆(劉錦玲 飾),只覺得前所未有的得到滿足。
不過就在擦鞋仔毫不知情既情況下,靚老婆正要展開奪產計劃,這又是另一個故事。
(全劇完~~~)
莫說是十多年前,即是以現在來說,體栽都是比較少見,特別是近年意識型態抬頭,電視台拍劇多是文以載道,如果此劇放在無線黃金時段播放,一定是全城熱話,可惜此劇集是亞視劇集,亦註定了此劇只能靜俏俏的出街,靜俏俏的結束。