唔理你身邊嘅佢係咪花心蘿蔔，日子耐咗，大家社交圈子唔同咗，大家嘅感情亦有可能變質。有陣時感情上嘅少少衝擊，可能會令你哋嘅感情更鞏固，但如果對方真係變咗心，繼續勉強一齊都無意思。如果心裏邊有懷疑，不如試下問自己下面呢3問題，睇吓佢係咪真係變咗心？

Q1. 最近佢係咪好多藉口話唔得閒？

好多時當男仔少咗同你出街，或者你話想安排節目，佢都諸多推搪，唔係話公司多嘢做，就係要同班兄弟聚會，甚至連message都覆少咗好多，咁就要認真觀察一下，佢唔得閒背後嘅真正原因係咩喇。講真，做嘢有邊個唔忙，但感情好嘅話唔理幾忙都會想見到對方，所以如果你哋最近少咗見面，而佢又唔係好有心想見你，你就要多注意一下了。

Q2. 點解佢嘅喜好忽然唔同咗？

明明佢最鍾意牛記笠記，但最近忽然姿整咗，又噴古龍水仲去修眉，買俾佢嘅衫褲話唔啱著所以唔著。就算陪你行街睇戲都成日埋怨話好悶，就連提議去旅行揀地點都嫌三嫌四。如果大家嘅共同興趣、話題越嚟越少，可能代表佢對你已經無之前咁遷就同包容，「性格不合」四個字背後究竟仲暗藏幾多危機？趁裂縫未擴大，盡快睇清楚問題嘅癥結。

Q3. 佢有無忽然改密碼？

如果平時你同佢都對對方好坦誠，兩個人之間無咩秘密，但忽然之間你發現佢Facebook多咗幾個陌生女仔嘅留言，佢仲好似有啲post block咗你，明明平時一日一post，突然之間無晒update。仲有佢嘅手機密碼係咪轉咗唔俾你知？成日有同一個人打電話搵佢或text佢？如果出現呢啲情況，就要加倍小心！