10/10/2002 放工同Daniel食飯傾偈.

09/10/2002 一早返旺角做apprasial,勁不滿. 放工又去左Kitty度入貨! 自己食飯.

08/10/2002 放工之後同男朋友同埋Michael哥哥同埋Steve哥哥o係旺角兆萬中心雲來打邊爐.

07/10/2002 尋晚用心良苦寫好張生日咭,今朝終於寄出左,呢張生日咭一方面係祝個friend happy birthday,另一方面係用黎安慰佢,因為我知道佢近來唔係咁開心. 其實,身邊朋友既情緒都幾影響我,如果我d好朋友唔開心,我心情都唔會好.

今日涼左好多,著左件長袖恤衫,都依然覺得好凍,於是一放工就返屋企,仲叫媽咪煮飯比我食添,佢又肯煮喎, 聽日仲可以帶飯添!!

06/10/2002 今日竟然訓到17:00先起身,本來麻麻尋日生日,又話今朝會去同佢飲茶,或者出去同佢食飯,但係大家都好似冇左件事咁......唉! 結果我起身之後就食媽咪煮既晚飯,睇下電視,執下D冬天衫. 成日都冇出過街,因為我實在太累,唔知點解呢! D精力唔知去哂邊. 聽日又要返工啦! 諗起就頭痛. 尋日亦得知有三個同事比公司炒左,因為唔需要咁多人手, 唔知幾時輪到我呢? 好驚好驚!!

05/10/2002 今日13:00放工後,落左旺角,同男朋友食lunch,食到好鬼飽,飽到嘔! 之後,我就隻身去到尖沙咀寶勒巷粵海酒店一樓既皇庭酒樓食飯. 因為今晚約左班舊同學,今次係幫Kelly慶祝生日. 我地包左房,有牌打,仲有電視睇添! 請埋Kelly都只係每人$150,都幾抵丫! 食完就返屋企lu.

04/10/2002 今日好無聊呀! 放工之後搭左好耐車去旺角,然後再落銅鑼灣,跟住再去灣仔,其實我想做既野好簡單,不過始終都做唔到,結果再由灣仔返旺角,然後返屋企. 都冇乜所謂啦! 我份人,真係冇乜所謂......我只係想自己開開心心過埋下半世.

03/10/2002 今日有個同事遲左成個鐘都未返到公司,又唔打電話返公司,可能趁阿姐放緊大假就作反啦! 結果 D senior同事就要我地聽日開始返到公司要簽到...唉! 真係比佢累死! 放工之後, 我O係荃灣南豐中心行左一陣就返屋企啦! 因為好眼訓呀! 呢兩晚都好夜訓, 今晚要早D訓先得.

02/10/2002 今日好free! 因為我阿姐放大假! 做起野上黎都輕鬆d! 我平時坐o係阿姐出面架! 對到正一正,所以平時返工真係好大壓力架! 放工之後落左旺角搵肥妹食飯,順便拎埋份手信. 佢o岩o岩去完泰國旅行丫嘛,只有兩個人有手信架咋! 呵呵! 其中一個就係我啦!

01/10/2002 起身之後,同妹妹一齊去左將軍澳華人永遠墳場既靈灰閣探爺爺,因為爺爺安葬左靈位之後,我地都未去過. 但係實在太多阻滯,又落雨,又唔識路,時間又緊迫 (最後一班落山既巴士開17:35) 總之結果我地係搵唔到爺爺個位o係邊!! 真係激鬼死我地!! 唯有下次早少少再去過探爺爺啦.

之後,我同妹妹就各散東西,因為佢要去剪頭髮,而我就約左男朋友,老霖同埋one-one去睇戲同埋睇煙花. 但係戲就睇唔到,因為d時間唔o岩,煙花就勉強睇到啦! 因為實在太多人,而我地揀既位置又o岩o岩比座酒店遮住,放得高果d煙花先睇到咋! 不過點都好啦,今次係我第一次o係現場睇煙花,多少都有d興奮既,最緊要係因為同一個我愛既人一齊睇丫嘛!