果陣我地十八歲，兩個都係柴娃娃，
最鐘意係去派對，跳完慢四跳喳喳。
當時妳梳馬尾裝，條裙著得幾短下，
我就吹個飛機頭，著褲梗著大喇叭。
間中去下西餐廳，扮跟潮流鋸牛扖，
放假我地去公園，柳底花間談心嘛！

果陣我地廿八歲，兩人開始成熟啦，
事業亦漸有成就，買車買樓買Leica。
看見朋友結晒婚，大家都會心掛掛，
於是雙方見家長，最後擺酒兼成家。
兩人由果一日起，住在同一屋簷下，
共同依靠共扶持，賣晒哈蘇生蘇蝦。

依家我地六十八，已經耳聾眼又花，
見盡滄海變桑田，真係唔化都要化。
已經唔可以跳舞，因為風濕中氣差，
亦唔能夠食牛扖，因為已經無晒牙。
朝朝都去耍太極，跟住走去飲早茶，
夜夜輪流訓梳化，等待孫兒早歸家。

但係我最慶幸係，雙方感情無變化，
我依然係間中會，送下情詩送下花，
妳就幫我補襯衣，臨訓幫我洗假牙，
我仍溫柔講情話，雖然明知都係假，
妳仍然會扮下靚，但已無膽頭戴花，
我發誓唔出去滾，其實….都已有心無力啦！

哈哈哈！